Fréttir
Göngu- og hjólabrýr yfir Elliðaárósa
Í desember 2011 efndu Reykjavíkurborg og Vegagerðin, í samvinnu við Verkfræðingafélag Íslands og Arkitektafélag Íslands, til opinnar samkeppni um göngu- og hjólabrýr yfir Elliðaárósa. Markmiðið var að fá fram frjóar og áhugaverðar, en jafnfram raunhæfar hugmyndir um nýja göngu- og hjólaleið yfir Elliðaárósa. Sigurður Ragnarsson, byggingarverkfræðingur var fulltrúi VFÍ í dómnefndinni.
Búast má við að samið verði við höfunda fyrstu verðlaunatillögu um áframhaldandi hönnun á verkefninu til útboðs. Reykjavíkurborg og Vegagerðin gera ráð fyrir að nýja göngu- og hjólaleiðin verði tilbúin í haust. Hún mun stytta leiðina milli Grafarvogs og miðborgar umtalsvert eða um 0,7 km. Gert er ráð fyrir aðskilnaði gangandi og hjólandi umferðar með það í huga að stuðla að bættu umferðaröryggi og gera leiðina greiðari. Umferð hjólandi og gangandi yfir Elliðaár er mikil og má gera ráð fyrir að hún aukist með tilkomu nýju leiðarinnar.