INNTÖKUREGLUR TFÍ

1. grein

Sá, sem áhuga hefur á að gerast félagsmaður í Tæknifræðingafélagi Íslands (TFÍ), snýr sér til skrifstofu félagsins og aflar sér þar upplýsinga um kröfur þær, sem félagið gerir til nýrra félagsmanna.
TFÍ skal gera væntanlegum umsækjanda ljóst, að viðkomandi beri sú skylda að veita TFÍ hver þau gögn, sem það telur nauðsynleg til staðfestingar á menntun umskæjanda. Sönnunarbyrði þar að lútandi hvílir öll á umsækjanda.

2. grein

Telji viðkomandi sig uppfylla kröfur félagsins til nýrra félaga, fyllir umsækjandi út sérstakt umsóknareyðublað og leggur fram gögn með umsókn sinni. Gögn þessi skulu veita sem gleggstar upplýsingar um þau atriði, sem við eiga sbr. 5. grein hér á eftir. Frekari gagna kann að verða óskað.

3. grein

Framkvæmdastjóri félagsins sendir menntamálanefnd TFÍ til umsagnar allar umsóknir um inngöngu í félagið.

4. grein

Menntunarnefnd leggur hlutlaust mat á umsóknir þær, sem henni berast. Hafi umsækjandi bein eða óbein samskipti við nefndarmenn varðandi umsókn sína meðan á afgreiðslu hennar stendur, fyrirgerir umsækjandi hlutleysi nefndarinnar.

5. grein

Mat menntunarnefndar TFÍ byggist á kröfum félagsins til menntunar umsækjenda.
Menntunarnefnd skal mæla með inngöngu umsækjanda í félagið, ef eftirfarandi skilyrðum er fullnægt:

• Umsækjandi hefur lokið námi með prófgráðu í tæknifræði við menntastofnun sem menntunarnefnd telur færa um að veita fullnægjandi menntun á viðkomandi sérsviði.
• Umsækjandi uppfyllir skilyrði til að fá leyfi ráðherra til að kalla sig tæknifræðing sbr. “Mat TFÍ á umsóknum um tæknifræðingstitil.”

  Eftirtaldir námstitlar teljast uppfylla framangreind skilyrði, enda er námskröfum fullnægt samanber FEANI-INDEX (European Federation of National Engineering Associations) eða ABET-skrá (Accreditation Board for Engineering and Technology, Ing). Athugið. Ekki sjálfgefið að ingeniör titill á prófskírteini veiti réttindi hér á landi til starfsheitisins tæknifræðingur eða inngöngu í TFÍ.

  Land	Námstitill	Athugasemdir
  Ísland	Lokapróf í Tæknifræði
  Danmörk	Diplomingeniör / Teknikumingeniör	Ath. Ekki sjálfgefið að ingeniör titill á prófskírteini veiti réttindi hér á landi til starfsheitis eða inngöngu í TFÍ.
  Finnland	Insinööri
  Noregur	Ingeniör
  Belgía	Ingénieur Industiel
  Bretland	B.Bc.(Honours)
  Holland	Ingenieur (Technical Ingenieur)
  Írland	B.Sc (Honours)
  Spánn	Ingeniero Técnico
  Þýskaland	Diplom Ingenieur / Ing .Grad.	Prófgráða skal vera frá Fach-hochschule (Dipl. Ing. (FH)) eða (Ing.grad)
  Bandaríkin	Engeneering Technology	Prófgráða B.Sc. in Technology Engeneering. Námsbraut skal hafa hlotið viðurkenninngu ABET.

6. grein

Menntunarnefnd TFÍ sendir stjórn félagsins umsögn sína.

7. grein

Ef umsögn menntunarnefndar er jákvæð ber stjórn TFÍ að mæla með því við ráðherra, að umsækjandi fái rétt til að kalla sig tæknifræðing.
Ef umsögn menntunarnefndar er neikvæð, ber stjórn að mæla gegn því, að umsækjandi fái leyfi ráðherra til að kalla sig tæknifræðing nema í algjörum undantekningartilvikum, eins og ef viðkomandi getur ekki aflað tilskilinna gagna vegna styrjalda eða af stjórnmálalegum ástæðum. Í slíkum tilfellum þarf stjórn að samþykkja meðmæli til ráðherra samhljóða.

8. grein

Framkvæmdastjóri TFÍ tilkynnir umsækjanda og/eða iðnaðarráðuneyti hverja afgreiðslu umsóknin hefur hlotið.

9. grein

Reglur þessar hlutu staðfestingu aðalstjórnar TFÍ þann 7. febrúar 1996.